童谣
荆柴仔花，檵柴仔花
荆柴仔花，檵柴仔花，
带崽带女结亲家。
亲家屋里几个女？亲家屋里三个女。
把个柘塘，把个麻塘，
把个屋里守爹娘。
守得爹娘牙齿雪雪白，
半斗谷来半斗麦，着发媒人走乡下。
乡下水茫茫，浸煞一个好姑郎。
大鲫鱼，拍巴掌；
小鲫鱼，哭老娘。
虾公仔，做媒人，
螃蟹仔，当新郎，
擦干眼泪来拜堂。
黄栀子花
黄栀子花，担张车，纺棉花。
纺双线，交给爹。
爹买茸，娘买花，
女仔伢仔过别家。
别家家家有，哇起媒人吃果酒。
果酒杯杯干，哇起女仔拜家官。
家官家婆不用拜，只要女仔手脚快；
一把剪刀一把尺，只要女仔会当家；
一把剪刀一杆秤，只要女仔会做人；
一把剪刀一张斗，只要女仔心思好。
红米仔歌，白米仔歌
红米仔歌，白米仔歌，
三岁伢仔学打歌。
间了三年不能打，皇帝老子派人来捉。
捉我咋？捉我上船打山歌。
大船来，杀大鸡；
小船来，杀小鸡，摇摇摆摆下江西。
江西门口九十九条河，条条河里出麻鹅。
麻鹅不吃铜盆水，打烂铜盆寻江河。
金子扁担银子箩，担得回来讨老婆。
有钱讨个红花女，冇钱讨个广东婆。
广东婆，肚翘翘，打只野鸡办三朝。
四两麻油四两姜，炒得野鸡喷喷香。
张打铁，李打铁
张打铁，李打铁，
打把刀仔送姐姐。
姐姐留我歇，我不歇，
我要回克学打铁。
打个钥匙开园门，
开得咋？开得斫竹仔。
斫得咋？斫得钓鱼仔。
钓得哪个吃？钓得裁缝吃。
裁缝吃了克哪里？裁缝吃了克做衣裳。
衣裳做得哪个穿？衣裳做得姐姐穿。
姐姐穿得咋？姐姐穿了嫁老公仔。
嫁到哪里？嫁到矬子树下。
矬子树下一只鸡公，把得姐姐做老公。
矬子树下一只鸡婆，把得姐姐做家婆。
矬子树下一口土砖，把得姐姐做家官。
矬子树上一粒矬子，打破了姐姐的腰子。
奸鸟仔
奸鸟（diǎo）仔，尾巴长，
剪短尾巴嫁姑娘；
姑娘短，嫁螃蟹；
螃蟹八只脚，嫁索螺；
索螺穷，嫁裁缝；
裁缝剪刀快，嫁只雁；
雁又蓬蓬飞，嫁只鸡；
鸡又咯咯叫，嫁只狗；
狗又汪汪叫，嫁乘桥；
桥又闪闪动，嫁乘砻；
砻又晃晃转，嫁乘碓；
碓里几个子，把得奸鸟仔吃哩克死。
求雨歌
扛狗公，扛狗婆，求雨落。
三霎风，四霎雨，奏请龙王落大雨。
求得大雨洒洒落，落一点，得一勺。
落两点，得一锅。上丘盖到下丘落。
割了早禾割七禾，割了七禾割挜禾。
割了挜禾种肥田，种了肥田望明年。
蛛蛛仔歌
蛛蛛仔，将布仔，
将了几件？将了三件。
把件公，把件婆，留件蛛蛛仔讨老婆。
样样难
十个指头两只手，从小跟人学放牛；
放牛又怕冷，学挖井；
挖井又冇劲，学磨针；
磨针磨不快，学放排；
放排怕拉纤，学做粉；
做粉冇人吃，学打锡；
打锡打肿手，学做酒；
做酒又怕酸，学烧砖；
烧砖又怕热，学打铁；
打铁懒拿锤，学擦背；
擦背难怄气，学唱戏；
唱戏怕挨骂，学叫化；
叫化懒背袋，唉，世上样样难！
掉秤砣
依橹摇橹，摇只船仔等舅母。
舅母过了河，掉了一个秤砣。
哪个捡到哩，请你把得还我，
不要害我依耶爸爸骂我。
月亮公公
月亮公公，担担鸡笼。
鸡笼一根葱，一担到广东。
广东买包盐，一担到县前。
县前买个鼓，担到吉安府。
吉安买个锣，一担到泰和。
泰和女仔出来看，火烧女仔咯裙带。
鸡笼壳，鸭笼壳
鸡笼壳，鸭笼壳，
有屎有尿日上屙。
夜里藏，藏到日头旺，
带携鸡婆鸭婆做干娘。